目錄 購物車 {{currentCart.getItemCount()}}

瓹窿瓹罅既故事

瓹窿瓹罅既故事

我地係香港土生土長既80後

係一年前機緣巧合下,我地成為咗一個菲律賓品牌Paradise既香港代理。

做咗一年,Paradise發展唔算順利,我地搵咗好多唔同既連鎖店、超市、餐廳,透過email,電話,叩門等等唔同方法,希望有機會將呢個新品牌帶入香港。但事實往往係令人沮喪,大部份都係無回覆,有回覆既都係要比一個高昂既上架費。但我地同好多香港人一樣,係唔會咁容易放棄!

直到2019年4月我地開始咗瓹窿瓹罅呢間Online Shop既idea,我地諗點解香港超市賣緊既野全部都係來自大集團? 點解我地出街想買支茶買支水都好似無乜choice? 我地決定要打破香港呢種大集團壟斷市場既病態!!

係籌備瓹窿瓹罅既時候,遇上反送中事件,呢件事令更多香港人醒覺,亦令我地更睇清楚呢個政府、呢個社會既不公平。作為真.香港人上街遊行、做文宣支持黃色小店責無旁貸,而係當中更睇到香港人係幾咁團結,令我地更加堅定成立瓹窿瓹罅係正確既選擇。

瓹窿瓹罅既責任

我地賣既野唔會係你周街都見到,我地會係世界各地瓹窿瓹罅發掘好嘢比大家,你地有好野推介我地都非常歡迎!!

我地支持本土,支持小店! 『己所不欲,勿施于人』有興趣同我地合作既本土或小店品牌,我地一律會以買斷、即Pay形式入貨,我地唔需要任何上架費或雜費,希望小店可以係資金上會更容易周轉,減低更多風險!!

我地愛地球、愛動物,瓹窿瓹罅會用多種既方式,同d環保或動物機構合作宣揚『愛地球、愛動物』!!

我地對社會不公義既事唔會視而不見,我地瓹窿瓹罅每一位都會盡能力去發聲去支持!!

我地會盡力做好自己既責任同本份,我地亦希望特首、香港政府、議員、警察......你地回頭是岸,唔好再錯落去!!

香港人加油💪 五大訴求 缺一不可🖐